Na lus di nha mimória ten

Rostu rugadu, sinal di tenpu

Kosta ratxadu, sinal di xikoti

Mô kalejadu, sinal di maltratu

 

 

Na lus di nha mimória ten

Melga, moskitu San’tumé

Salmora d’águ kosta baxu

txeru kakau, kunkun, kafé,ku fruta pon

 

 

Na lus di nha mimória ten

Nhu Kapataz ten Águ-izé

Fula, Badiu, Forru Papel

Ten Senzala, ten kasa grandi

 

 

Na lus di nha mimória ten

Stória d’amor stória di dor

Na lus di nha mimória ten

Stória dum beju, un bafatada

 

 

Na lus di nha mimória ten

Stória d’un pretu, ki djunta k’un branka

Es faci mininu bunitu, kusa da brónka

Pretu bá tronku…

 

Stória d’un preta, ki djunta k’un branku

Es faci mininu bunitu, kusa da brónka

Preta bá senzala